Obreiros de Alcoa San Cibrao cortaron este venres con barricadas de pneumáticos o tráfico na autovía Vilalba-Ferrol (AG-64), á altura do quilómetro 42,3, no municipio de Xermade. Trátase dun punto próximo ao enlace de Cabreiros, onde conflúen as estradas LU-540, que vén de Viveiro pola Gañidoira, e LU-170. O corte da circulación comezou ás 10.29 horas, segundo os datos do mapa interactivo da Dirección General de Tráfico (DGT). Ao peche desta información, ás 14.15, quedara restablecido.
Trátase dun novo acto de protesta do persoal na súa pelexa por manter a produción e o emprego na planta de aluminio do complexo industrial de Cervo, onde a multinacional anunciou un despedimento colectivo con ata 534 afectados, unha medida que afectaría tamén a alomenos 400 operarios das empresas auxiliares.
Para que o tráfico non quedase interrompido, a Garda Civil habilitou desvíos alternativos pola estrada LU-861, a vía que comunica Vilalba coa localidade das Pontes de García Rodríguez.